كذبة غشاء البكارة الصيني تكشف عوراتنا الإعلامية
ديسمبر 26, 2009
وراء كل سي السيد، كائن مذعور
ديسمبر 26, 2009

نسرين لطفي
نرجع تاني ونتكلم عن المرأة ، المرأة المقهورة، لكن المره دي انا عايزة آخد رأيكم في حاجة، مشهد بنشوفه كل يوم حوالينا، والمشهد ده جزء من التقاليد البالية الماسخة، والمعتقدات العقيمة الموجوده في مخ معظم الناس واللي بيطبقوها في حياتهم وبيحاولوا يفرضوها على غيرهم من غير مايفكروا للحظة في ماهية هذه التقاليد و منطقيتها من عدمه، وجيل ورا جيل بيتربى وبيكبر وهوا بيردد نفس الكلام وبيربي ولاده عليه.

موضوعنا النهارده هو ببساطة: المرأة المطلقة ونظرة المجتمع ليها ، لما المرأة تدخل في جوازة وبعد سنتين تلاته تلاقي ان حياتها مع الزوج ده مستحيلة، ليه الأهل دايما بيضغطوا عليها عشان تستحمل الحياة مع واحد مافيش تفاهم بينها وبينه؟ ليه دايما بيهددوها بـ “نظرة المجتمع” ليها ، و قد إيه الـ” ناس مابترحمش” وقد ايه الناس هايبصوا لها بصة مش حلوة عشان هي مطلقة في العشرينات او التلاتينات؟ وكان المرأة المطلقة = داعره مثلا؟ في حين ان الرجل المطلق بيتقال له: ياحرام؟ أو الراجل اللي بيعاني في زواجه بيتقال له: طلقها وارميلها العيال واتجوز واحده غيرها بنت بنوت ونقي على مزاجك وبراحتك؟ وده غالبا اللي بيحصل!، الأم هي اللي بتلبس العيال والراجل بيخلع ويبدأ حياته من جديد.

الجزء الأهم بأه في الموضوع ده هو لما يكون في أطفال نتيجة الزواج الفاشل ده، ليه دايما المرأة في الحالة دي ، ومهما كانت بتعاني وبتتمرمط في الجوازة دي، تصمم أو تجبر أنها تستحمل عشان “العيال مايتربوش من غير أب” أو مايعيشوش في وسط أب وأم منفصلين؟ ليه دايما بنطالب الأم انها هي اللي تضحي وتستمر في حياة تعيسة عشان خاطر “العيال”؟

أنا رأيي الشخصي إن المرأة لازم وحتما تتطلق وتقفل باب العذاب اليومي ولا إنها تضيع عمرها وحياتها وشبابها في حياه مستحيلة ، لمجرد إن الأولاد مايتربوش في عيلة مفككة والكلام ده كله ، وده لأكتر من سبب.

أولا:
الأب لو كان شخص مش كويس، اوعى حد يفتكر انه هيطلع من تحت ايده جيل مسؤول متربي كويس محترم وعنده أخلاق، طبعا هايطلع صوره ماسخة منه بكل عيوبه وأرفه، نفس الشيء بالنسبة للأم.

ثانيا:
هل تعتقدوا ان الطفل اللي بيكون متربي مع اتنين مش طايقين بعض هيطلع طفل سليم وطبيعي؟ نسبة الخسارة هاتكون قد إيه لو قسنا حجم الضرر اللي هيقع عليه لو اتربى مع أم فقط أو أب فقط؟ هو الطفل أما يعيش تحت سقف بيت مليان بالخناقات الأسرية اليومية ده هيطلع طفل سليم نفسيا؟ بل على العكس، ده انت كده ظلمت الأولاد أكتر لأنك اجبرتهم يعيشوا في الجو المشحون ده، لما الأولاد تكبر وهما بيشوفوا ابوهم بيمد إيده على أمهم أو امهم بتهين ابوهم ، لما يصحوا ويناموا على خناقات وإهانات بين الأب والأم ياترى هايحسوا بالسعاده؟ ياترى هي دي تربية سليمة؟ اي جيل هايطلع من تحت الجو ده؟

ثالثا:
لا هم أول ولا أخر اطفال اتربوا بأم فقط او أب فقط، ليه هي دي الشماعة اللي بنعلق عليها فشلنا في تربيتهم. ليه أصلا ده في حد ذاته مبرر أو ذريعة للاستمرار في الغلط؟

رابعا:
انا ظلمت نفسي واخترت زوج غير مناسب، ليه بأه أظلم أولادي بأني أجبرهم يتربوا مع أب غير مناسب؟ ليه أحرمهم من فرصة انهم يتربوا مع أب أو أم أفضل؟

خامسا:
ايه مبرر الاستمرار في زواج فاشل؟ اني الاقي حد يصرف عليهم؟ طب ليه المرأة هنا بتختار تكون ضعيفة و dependable على انها تشتغل وتصرف عليهم؟

سادسا بأه وده الأهم:
فين بأه حياة الزوجة؟ فين عمرها؟ ليه تظلم نفسها ليه ماتجربش حظها مرة تانيه؟ مش يمكن تلاقي الرجل اللي يقدرها ويعاملها باحترام؟ الراجل اللى تلاقي نفسها معاه؟ ليه تحرم نفسها من احتمال ولو ضئيل انها تكون سعيدة فعلا مع راجل يديها بإخلاص؟ هي و أطفالها؟ مش وارد انه يحب الأولاد أكتر من أبوهم البيولوجي؟

أنا عملت تاج ليكم عشان انا باحترم وبأقدر رأيكم حتى لو هاتختلفوا معايا وأحب أسمع كل اللي بيدور في دماغكم بخصوص الموضوع ده.