بدون إثبات شخصية: حكايات العاملات في مرصد 190 للعنف في القطاع غير المنظم

بدون إثبات شخصية .. الحكاية الثانية من التقرير الأول لمرصد 190 عن العنف ضد العاملات في القطاع غير المنظم.

“أنا (…) ، بشتغل في القوطه وكل شغلانه تطلع قدامي، أضطر أشتغلها عشان أجيب لقمة العيش. حياتنا في الشغل صعبة جدا، والمشرفة اللي بتشرف علينا بتعاملنا بأسوأ شكل، بتشتمنا بأفظع الشتايم وتسبنا، احنا بنشتغل في ظروف ما حدش يقدر يتحملها.

الواحده فينا بتصحى من النوم الساعة 2:00 بالليل، ونبدأ شغلنا من الفجر لحد الساعة 3:00 العصر. طول اليوم واقفين على رجلينا، ما فيش لحظة راحة، لو واحدة فينا فكرت تقعد شوية ترتاح، بتتنهزأ وتتشتم قدام الكل. يوميتنا ما تعديش الـ50 جنيه، وسعات 45 جنيه، ومنهم بنصرف على الأكل والشرب طول اليوم، وكمان بندفع أجرة العربية اللي بتوصلنا للشغل.

المشوار للشغل بياخد ثلاث ساعات رايح وثلاث ساعات جاي، يعني 6 ساعات ضايعين من يومنا في الطريق. ولو حصل لنا حاجة في الطريق، زي ما بيحصل ساعات، محدش هيسأل فينا ولا هيلاقينا، لإننا حتى ما معاناش بطايق ولا أي إثبات احنا مين. ممنوع علينا ناخد بطايق معانا، واسمنا الوحيد اللي بيبقى مكتوب في سجل أو كراسة المشرفة.

حياتنا كلها تعب وضغط، ومفيش حد بيهتم بينا، حتى الحمامات مش موجوده، بنضطر نعمل حمام في الصحرا.

احنا عايشين بدون أي حقوق، كرامتنا منداسه بالجزم، وكل يوم بنعاني في الشغل بدون ماحد يشوف أو يهتم”.