يعرض التقرير الأول لمرصد 190 حول العنف ضد العاملات في القطاع غير المنظم، عدد من الشهادات الحية لعاملات يتعرضن لعنف في بيئة العمل

حياتنا في الشارع مش سهلة
“أنا بشتغل في الشارع ببيع خضار، يعني حاجات زي الجرجير والبقدونس والحاجات البسيطة دي. كل يوم بصحى من الفجر، أطلع أجيب الخضار طازة عشان أقدر أبيع للناس. الشغل في الشارع مش سهل خالص، مليان مشاكل ووجع راس. الناس في الشارع مش كلها بتقدر تعبنا، في اللي يجي يترازل علينا ويتكلم بأسلوب وحش، وفي اللي يناهد معانا ويفاصل وف الاخر ميشتريش بجنيه.

مرة حصلت لي مشكلة كبيرة، كنت واقفة ببيع زي كل يوم، فجأة جات لي واحدة واتخانقت معايا من غير سبب. ضربتني وقلبت الفرشة بتاعتي على الأرض. كل الخضار وقع واتبهدل، وانا مش عارفة أعمل إيه. اليوم ده كان صعب جدا عليا، مش بس عشان خسرت اللي كنت هكسبه، لكن كمان عشان حاسيت اني ملطشه ماليش حد بيحميني.

اللي زاد وغطى بقه هو لما احتاج أروح دورة المياه. في زاوية جنبينا بتفتح وقت الصلاة، لكن باقي اليوم بتبقى مقفولة. يعني لو احتاجت أروح الحمام لازم أستنى لما الزاويه تفتح، وفي الصيف ده بيبقى متعب قوي، خصوصا ان الظهر بيأدن الساعة 1:00 وأنا ببقى نازلة من 7:00 الصبح. سعات بحاول ألاقي قهوة أو أي مكان أروح فيه، بس ده طبعا مش منظر ولا حاجة كويسة، بس هنعمل إيه، ده اللي موجود.

أوقات باضطر أسيب الفرشة جنب أي حد أعرفه لحد ما أرجع، وكل شوية أبقى قلقانة على الخضار. الشغل في الشارع كده، ما فيش أمان ولا حماية، وساعات الناس بتبقى صعبة علينا بس ربنا المستعان. بنجري ورا لقمة العيش عشان نقدر نربي عيالنا، ومش عارفين نعمل إيه غير إننا نتحمل ونكمل في الظروف الصعبة دي.

حياتنا في الشارع مش سهلة، ومشاكلها كتير، بس لازم نصبر ونحاول نستحمل. الشغلانة دي هي اللي بتجيب لنا الأكل والشرب، ومهما كانت صعبة، هنعمل إيه؟ نعيش ونتحمل عشان خاطر عيالنا”.