نكمل حملتنا #مش_طبيعة_المهنة مع الشهادة الثانية، وهذة المرة في قطاع خدمة العملاء، تحكي صاحبة الشهادة قائلة:

أنا بشتغل فى شركة اتصالات، وكالعادة تقريبا بتحصل مشاكل بشكل يومي، فى يوم دخل عميل عايز يجدد الباقة فقلت له السيستم واقع، ودى حاجة مش بإيدى لقيته فضل يزعق، ويقول هو كل يوم السيستم واقع هو احنا مفيش ورانا غيركم مثلًا، وبعدين بدأ يشتم! ولما قولتله حضرتك بتزعق ليه؟

احنا يعنى أكيد مش عايزين نعطل الشغل، ولا نعطل حضرتك بس غصب عننا، فضل يكمل شتيمه، ومد ايده كمان لحد ما مدير الفرع طلع وقعد يهديه، ويقوله معلش وحقك علينا والموضوع  خلص على كده.

ولما قلت للمدير بعدها، طب أنا فين حقى؟ أنا اتهنت بدون وجه حق، ومحدش حتى قاللى معلش، فالمدير قاللى احنا بنشتغل مع جمهور، يعنى خليك سفنجة ولازم تمتص غضب الناس، دى طبيعة شغلنا .