شهادة اليوم تأتي من موظفة خدمة عملاء، وهي الشهادة الرابعة من حملتنا #مش_طبيعة_المهنة، تحكي صاحبة الشهادة قائلة: 

“كنت بشتغل فى شركة من شركات الاتصالات، فى خدمة العملاء، وتقريبا كان ممنوع عندنا الاجازات، والأُذونات، وكل حاجة، واللى حصل قدامى موقف مش هقدر انساه، لأن كان لينا زميلة حامل وحصل لها نزيف، وفضلت تطلب من مدير الفرع انها تمشى، وإنها محتاجة تروح للدكتور ضرورى وهو مع الاسف مش بيصدق أي حاجة، ومصمم إن اللي بيشتغل فى الشغل ده عارف من الأول إن ما ينفعش يستأذن في الشيفت، تحت أي ظرف، وإحنا فضلنا نتحايل عليه، إنها تمشى وإحنا هنقعد ونشيل شغلها، ومرضيش برضو، لحد ما هي أُغمى عليها في الشغل، واضطرينا نطلب الإسعاف، بس مش عارفة إزاى كل ده حصل، ويعنى الشغل يوصلنا للمرحلة دى.”

وأنتن شاركونا قصصكن.