حكيتلنا هناء، عاملة في مصنع عن تجربتها مع التحرش والتعسف في مكان العمل. وهو يعتبر من أشكال العنف النفسي والجسدي اللي بتناهضه اتفاقية 190 سي.
“كنت شغالة في مصنع بناطيل جينز في الاستثماري، وقعدت فيه مدة طويلة أنا تقريبًا متربية معاهم لحد ما جالنا مُشرف جديد في الصالة كان شكله محترم في الأول، وبعد شوية بقى يهزر ويضحك مع كل البنات وبعدين بدأ يضايقني أنا وكام بنت كمان يحط إيده ويتلزق ويبص بصات مش اللي هي.

مرة على مرة فاض بينا وطلعنا اشتكينا في الإدارة وقالولنا هنتصرف معاه بس محدش عمل حاجة، وبقينا نحس إنه مترصدنا وبيرازينا ويكدرنا في الشغل زيادة.
صعبت علينا نفسنا إن إحنا بقالنا كتير معاهم ومحدش سأل فينا، وحسينا إنه خلاص حطينا في دماغه اضطرينا ناخدها من قاصرها ونمشي أنا وبنتين كمان، والأرزاق على الله، بس هيدور على غيرنا ويقرفهم برضه مادام محدش وقفله.”

* القصص من واقع شهادات وثقها فريق المؤسسة، وذلك بعد أخذ موافققة صاحباتها على النشر
* لبيئة عمل آمنة للنساء، شاركونا بالتوقيع على بيان الاتفاقية.

#التصديق_يوصّل_للتطبيق

شعارنا لتطبيق اتفاقية 190 بشأن العنف والتحرش في عالم العمل، في أماكن العمل وصولًا للتصديق عليها، سعيًا لحماية النساء في عالم العمل من أية انتهاكات قد يتعرضن لها، وتوفير بيئة عمل آمنة للجميع

شاركينا شهاداتك عن أي انتهاكات تعرضتي لها في مكان عملك