شهادة أخرى من المضايقات التي تتعرض لها العاملات، والموظفات ضمن حملة #مش_طبيعة_المهنة.

” اسمى ح ص

بشتغل ممرضة بقالى 22 سنة، طبعا شغلتنا كلها متاعب ومشاكل، والإعلام بيشوه صورتنا، الناس بتتعامل معانا بجد بطريقة بشعة . إحنا اكتر أماكن بتحصل فيها وفيات فى المستشفى هى الاستقبال، والطوارئ، وطبعا الرعاية، فى الطوارئ حالات كتبر بتبقى جاية عاملة حادثة، وساعات الحالة بتبقى واصلة خلصانة أصلا، والناس طبعا بتبقى من الصدمة منهارة ومش عارفة بتعمل أيه، بيفضلوا يزعقوا ويتخانقوا، ونفس الكلام برضوا لما بنبلغ أهل المريض فى الرعاية، انه الحالة اتوفت الناس بتبقى غضبانة جدًا، وعايزة تصب غضبها على أي حد مع الأسف، الدكاتره بيختفوا فى اللحظة دي، والناس مش بتلاقى غير التمريض تمسك فيه، وقبل كده أهل مريض ضربوا البنات التمريض وكسروا ازاز الرعاية وبهدلونا، ومحدش رضى يعملنا محضر ولا حاجة، إحنا طبعا بنبقى مقدرين حالة الناس والإدارة بتفضل تقولنا إنتو ملايكة الرحمة، وخليكو سفنجة، بس إحنا برضه لينا طاقة، ولينا كرامة، ومحتاجين الناس تقدرنا زى ما بنقدرهم.”

إنتي كمان تقدري تشاركينا بشهادتك على رسايلنا الخاصة.