بالبلدي الفصيح:كيف تأسس حزبا سياسيا حسب التعديل الجديد لقانون الاحزاب

صدر المجلس العسكري يوم الاثنين تعديلاً لقانون الأحزاب يفتح الباب أمام الجميع لإنشاء أحزاب جديدة بقواعد جديدة قبل انتخابات مجلس الشعب في سبتمبر، لكن في الوقت نفسه هناك شروط مختلفة وإجراءات يجب القيام بها قبل إنشاء أي حزب. تعرف على هذه القواعد بلغة بسيطة.

ما هي إجراءات إنشاء حزب جديد؟

لو عاوز تأسس حزب جديد لابد أن تجمع خمسة آلاف مواطن مصري من 10 محافظات على الأقل،وكل محافظة من العشرة دول يكون فيها 300 على الأقل، يعني ببساطة مينفعش تلم أصحابك اللي عايشين في القاهرة مثلا وتأسسوا حزب لوحدكم، لازم يكون عندك أعضاء من 10 محافظات مختلفة ومن كل محافظة منهم 300 واحد.

والشرط ده هدفه أن حزبك يكون له انتشار جغرافي بحيث المجتمع يضمن أنك مش مختار أفراد عيلتك أو مش مختار ناس ليها مصلحة معينة بحكم إقامتهم في مكان واحد، لازم المصلحة تكون وطنية.

وكل واحد من الخمسة آلاف عضو المؤسسين هيحتاج يعمل توكيل لك في الشهر العقاري بموافقته على الانضمام للحزب ودي تكلفتها للفرد 15 جنيه يعني المجموع هيكون 75 ألف جنيه على الأقل.

بعد كده هتقدم ورقك وتوكيلاتك وبيانات حزبك زي أسماء أعضاءه ومصادر التمويل بتاعتكم وحسابكم في البنك ولايحة الحزب الداخلية ونظام العمل جوه الحزب إلى لجنة الأحزاب، ودي لجنة مكونة من 7 قضاة من محاكم مختلفة، وبعدها بـ8 أيام هتنشر أسماء الأعضاء الـ5 آلاف بتوعك في جرنالين كبارعشان تكون الناس كلها عرفت بوجودك وتثيت انك شغال في النور، ومصاريف الإعلان على حسابك.

وفي خلال 30 يوم بعد تقديم ورقك وده اللي اسمه “الإخطار”،  ولو لجنة الأحزاب لم تعترض على الحزب بتاعك يبقى مبروك عليك وعلى الأعضاء، أصبح عندكم حزب جديد.، يعني انت مش هتكون محتاج إلى موافقة اللجنة المكتوبة، واللجنة ليها الحق تعترض على حزبك خلال 8 أيام من تقديم أوراقك إذا خالفت الشروط

طيب ايه هي بقى الشروط اللي تضمن إنشاء الحزب؟

أولا : اسم الحزب لازم ميكونش مشابه لاسم حزب وجود .. يعني مينفعش تسمي نفسك الوفد أو التجمع أو الغد أو اسم مشابه لأسماء موجودة دلوقتي منعا للخبطة الناس

ثانيا : مباديء حزبك وأهدافه وبرامجه لازم لا تتعارض مع مباديء الدستور المصري ولا تتعارض مع أمن مصر القومي أو السلام الاجتماعي أو الديموقراطية .. يعني لازم أفكارك متكونش شاذة مينفعش تعمل حزب هدفه مثلا مساعدة إسرائيل أو برنامجه يكون محاسبة الناس اللي بتعبر عن رأيها بحرية أو يكون هدفه محاربة الفلاحين أو العمال أو رجال الأعمال، لازم أفكارك تكون إيجابية ولا تقوم على إيذاء الآخرين.

ثالثا والنقطة دي مهمة جدا بقى، ان لا يجوز أن اختيار أعضاءك أو برامج حزبك وأهدافه تكون على أساس ديني، يعني مينفعش تعمل حزب للمسلمين بس او للمسيحيين بس أو على أساس طبقي للأغنياء بس اللي ثروتهم أكتر من حد معين، أو على أساس فئوي يعني تعمل حزب للدكاترة أو المهندسين أو على أساس طائفي يعني تعمل حزب للشيعة أو للسنة أو للكاثوليك ولا ينفع تعمل حزب للستات بس او الرجالة بس او للي بيتكلموا لغة معينة .. لازم الحزب يكون شامل للناس ولا يستبعد حد

ومعنى النقطة دي أن الاخوان المسلمين مثلا لو أرادوا تأسيس حزب لازم يكون مفتوح للمسلمين والأقباط ولكل الأديان وميفرقش في العضوية او في المناصب القيادية او في تطبيق برنامجه على أي شيء يميز المسلم عن المسيحي، وفي نفس الوقت الكنيسة كمان أو الأقباط ميقدروش يعملوا حزب للمسيحيين لوحدهم او يدي ميزة للمسيحي على حساب لمسلم

رابعا : مينفعش الحزب يكون له مجموعة من الأعضاء المسلحين او اللي بيستخدموا السلاح بأي شكل زي الجماعات اللي بتقوم عمليات إرهابية أو عسكرية في دول تانية غير مصر، ده ممنوع تماما

خامسا : ممنوع تعمل حزب تابع لحزب أجنبي أو منظمة أجنبية، يعني مثلا متقدرش تعمل حزب للأمم المتحدة أو حزب تابع للجزب الجمهوري في أمريكا، لازم يكون مصري أصلي وكمان الأعضاء لازم يكونوا مصريين ولو حد منهم واخد الجنسية جديد لازم يكون مر على حصوله عليها خمس سنين.

سادسًا: علانية مبادئ الحزب وأهدافه وأساليبه وتنظيماته ووسائل ومصادر تمويله، يعني كل الحاجات السابقة دي تكون في النور وجاهزة للكشف عليها في اي وقت.

سين وجيم عن إنشاء الحزب

كيف تدرس لجنة الأحزاب طلب إنشاء الحزب؟

دور اللجنة هي فحص كل الأوراق المقدمة إليها من مؤسسين الحزب والتأكد من عدم مخالفته للشروط وإذا أرادت الاعتراض على الحزب تتخذ قرارها بأغلبية أصوات القضاة السبعة المكونين لها.

ماذا يحدث لو رفضت لجنة الأحزاب إنشاء الحزب؟

في حالة الرفض ستقوم اللجنة بنفسها بعرض قرارها على المحكمة الإدارية العليا عشان المحكمة الإدارية تؤكد صحة القرار بفحص الموضوع مرة تانية خلال 8 أيام من الرفض

كيف يتم الصرف على الحزب ماليا وما مصر أمواله؟

مصدر أموال الحزب كما هو واضح في القانون هو اشتراكات الأعضاء وتبرعاتهم المادية مع وضع حد أقصى لتبرعات كل فرد حتى لا ينفرد راجل غني مثلا بتمويل حزب من جيبه،يعني التبرعات لازم تكون من مصادر مختلفة ومن داخل مصر لأن محظور تماما تلقي تبرعات من الخارج، وكمان الحزب يقدر يحدد أساليب معينة لجمع الأموال بعرضها على لجنة الأحزاب بشرط يكون هدفه غير تجاري، وببساطة لازم نعرف ان في الدول الديموقراطية تعتمد الأحزاب دائما على تبرعات كل الأعضاء والمؤيدين ليها عن طريق حملات منظمة، وفي النهاية يخضع الحزب لرقابة الجهاز المركزي للمحاسبات واللي هيكون مسئول عن معرفة كل مليم دخل او خرج الحزب لضمان النزاهة.

ماذا يحدث إذا قام الحزب بتغيير مبادئه أو نظامه بعد إنشائه رسميا؟

إذا تبين للجنة الأحزاب أن في حزب خالف الشروط المذكورة سابقا فمن حقه التقدم بطلب للمحكمة الإدارية لوقف نشاط الحزب وإلغائه كمان.

هل معنى ذلك أن جماعة الإخوان المسلمين لن تؤسس حزب سياسي لأنها جماعة دينية؟

بحسب كلام صبحي صالح عضو جماعة الاخوان المسلمين وعضو لجنة التعديلات الدستورية في قناة أون تي في يوم الاثنين فإن الجماعة ستؤسس حزب مدني وغير ديني وعضويته متاحة للجميع ويشارك في الحياة المدنية ولن يحمل اسم ديني ولن يشترط لعضويته عضوية جماعة الاخوان أو التربية على مبادئها ويأتي كلام صالح تأكيدا لتصريحات قيادات الاخوان باتخاذ هذه الخطوة للحصول على الحق في تكوين حزب سياسي والحرص على عدم تقسيم المجتمع المصري على أساس الديانة.

ايه اهم الفروق بين قانون الأحزاب القديم وتعديلاته الجديدة؟

الفرق الرئيسي هو تسهيل عملية انشاء الحزب بمجرد تحقيق الشروط ودون انتظار رأي اللجنة القديمة اللي كان النظام الخاص بالرئيس السابق مبارك مسيطر عليها، وحسب التعديلات الجديدة أعضاء لجنة الاحزاب هيكونوا قضاة مما يعني تطبيقهم الشروط بحياد تام، كما أن الحزب لن ينتظر موافقة بل كل المطلوب منه هو مجرد اتخاذ الإجراءات ولن يتم منعه إلا لو كان مخالف

وكمان التعديلات الجديدة زودت عدد الأعضاء المطلوبين في البداية إلى خمسة آلاف عضو بدل ما كانت ألف بس في القانون السابق وده هدفه التأكد من جدية الحزب الجديد وأن له شعبية فعلا في كافة أنحاء الجمهورية، وكمان التعديلات لغت الفلوس السنوية اللي كان أي حزب سياسي بياخدها من الدولة حوالي 100 ألف جنيه سنويا، وده بهدف أن محدش يعمل حزب عشان ياخد فلوس من الدولة زي ما حصل مع بعض الأحزاب غير الجماهيرية اللي نظام مبارك سمح لها بالوجود كديكور.

ما أهم الانتقادات الموجهة للتعديلات الجديدة؟

أهم الانتقادات هي زيادة عدد الأعضاء مما يعني تكلفة كبيرة لأي حزب ناشئ يحاول السعي للحصول على جماهيرية سواء بتدبير قيمة التوكيلات (75ألف جنيه) أو باقي المصاريف بالإضافة لجمع الخمسة آلاف شخص وده رقم كبير لو في شباب بيحاولوا يأسسوا حزب من بعد 25 يناير، لكن كمان في عصر الإنترنت العيب ده ممكن القضاء عليه بتواصل الناس باستخدام التكنولوجيا والتنسيق بين المحافظات.

إقرأ أيضا :

نص تعديلات القانون : http://bit.ly/f6sLD4

شاهد نقاش يسري فودة مع الدكتور عمرو الشوبكي وصبحي صالح لمناقشة التعديلات وتأثيرها : http://bit.ly/g8nArA

المصدر

الصفحة الرئيسية